تعبنا صور حداد
وهدر دم الولاد
في كل حته
في قلب بلدي
تعبنا من كتر ماقولنا
في كلام شعارات
وحكومة بتاخدنا
على اد عقولنا
بقولتهم دي مؤامرات
انا مواطن مصري عادي
متمرمط جداً في بلادي
لكني مهما شوفت فيها
راح افديها بدم ولادي
بكتب رسالتي للسادة المسئولين
يا سيادة الرئيس المنتخب
بالارادة الشعبية
حق اللي ماتوا في رقبتك وَجَب
بحق ساعة المغربية
اللي بيها الارض فطرت من دمهم
ايه ذنبهم...؟
غير انهم واقفين بيحموا ارضهم
اتخدوا هما الضخية
يا سيادة المسئول
اللي لسه في الخط نايم
راح يعلى صوتي وليك هقول
انت في ماية البطيخ عايم
طب هقولك..
انزل الشوارع والحواري
اقعد اسمع عالقهاوي
في الحكاوي
عن صراخ كل ام وكل اب
جالوا صدمة بموت ولاده
كل اللي عليه قولة يا رب
والسكوت بقى هو حاله
ماشي ماسك في الصور
لابنه اللي مات
عمال بيصرخ ان قدر
تتزلزل الارض بااهات
يحلف ان ابنه راجع
واللي واجع
ان صوته اللي واصلك
نبرته كات من سكات
لنا الله
ردحذف