الثلاثاء، 31 يوليو، 2012

قلبي ملك ربي


الثلاثاء، 17 يوليو، 2012

زي الاطفال




وياك بلاقيني بقيت طفلة

عمالة تتشعلق في هواك

شبطانة فيك وماهيش خايفة

طول ماهي شايفاك

بتعدي سنين 
وانا لسه معاك

سمعاك حاساك

بصغر في العمر كتير لكن

بيزيد احساسي جواك

طب اقولك على حاجة كمان

وبلاش تقول دة بقى شغل جنان

انا عايزة فانوس زي الاطفال

تلعب ويايا كمان بيــــــه

وكأني عارفاك في زمان

تنطيط وشقاوة ولعب عيال

مستغرب لية

دا انا عايزة تجبلي حاجة حلوة

و تاخدني و نركب مرجيحة

و أياك تقول إن أنا طفلة

دة انا بس واضحة و صريحة

انا عايزة اعيش وياك عمري

و اشطب من قبلك حكاياتي

و أشوف...

في عنيك شمسي و قمري

و تكون ويايا في طفولتي

ولأخر يوم بقى في حياتي

فاانا عايزة تجيبلي حاجة حلوة ^_^ ♥

الاثنين، 16 يوليو، 2012

بس بحبكـ





و لما قالها في مرة

أنا خلاص حوشت مبلغ كويس
 
يعني أقدر أفك عقدتك

وأجي أتقدملك و أمري لله خلاص بقى

داريت ضحكتها بنظرة عنيفه 

رفعت فيها حواجبها

نظرة فرحة هو الوحيد بس اللي يفهمها

و قالتله مين قالك أصلاً إني موافقة

قالها يا شيخة أتلهي هو أنتي اصلاً 

كنتي لاقيه دا لولا اني قولت أكسب ثواب

كشرت أووي ساعتها وزعلت

قالها خلاص خلاص 

أنا بس بهزر معاكي

عشان تزعلي و أصالحك

و أقولك اني بحبك أكتر منك كمان


فضحكت وقالتله رخم بس بحبك

قالها شوفتي انك واقعه ازاي :D

بس بحبكــ

الأربعاء، 11 يوليو، 2012

تسمحيلي بالرقصة




ومن بين كل البنات جاني

وقالي تسمحيلي بالرقصة

لاقيت الدهشة عنواني

ومن هنا جيت القصة

لاقيته بيسالني من تاني

ومش عارفة ارد بايه

مليون حاجة فيه عجباني

تايهة غريقة في نن عنيه

بيرسمني في كل كلامه

حبيبته اميرته في احلامه

محسسني بإنه كمان

امير بحصان

وجاي يخطفني على حصانه

غريبة لاقتني بناديله

وبديله ...

اشارة شوق

و راح القلب يحكيله

في مواويله..

كأني معاه بجد بفوق 

دا من بين كل البنات جاني

وقالي تسمحيلي بالرقصة

لاقيت الدهشة عنواني

ومن هنا جيت القصة

الثلاثاء، 10 يوليو، 2012

ست البنات





بيقولوا عليا عصبية

والله إشاعات

انا هادية رقيقة رومانسية

وماليش حوارات

بس تضايقني هتعصب

هتطول انا ممكن اضرب

بس ....

ساعات و ساعات

شكلك كدة انت اتخضيت

دة أنا شطورة في شغل البيت

بعرف اسلق و اقلي البيض

من غير ما أسأل حتى إزاي

لاء وكمان انا بعمل شاي

والله بجد مش اشتغالات


دي عروستك حلوة وطعمة

ومفيش زيها ف الحكايات

عسولة خالص وشقية

وكمان ست البنات

يكتبوا فيا شعر و روايات

و بااسمي يكتبوا ابيات

هيقولوا حاجات و حاجات 

مالهاش نهايات

مالك أيه في اعتراضات؟؟

دي عروستك انا ست البنات

الاثنين، 9 يوليو، 2012

هي





بص هي لما قالتلك إنها بتحبك 

وماتقدرش تعيش من غيرك

ماكنتش بتكدب عليك

بالعكس دي كانت صادقة جداً

بس انت لما جرحتها 

وهينت كرامتها

كان لازم تقولك كفاية

كان لازم تقدر تستغنى عنك

اصل هي لما حكتلك عن مشاعرها

وضعفها قدامك

مااستنتش منك إنك تجرحها وتستقوى عليها

كانت مستنياك تهتم بيها وتخاف لتجرحها

فكان لازم تمشي من حياتك حتى لو هتتألم

فماتلومهاش وتقول عليها كدابة

وبلاش تشوه صورتها فـ عنيك

هي كانت جميلة وهتفضل جميلة

بس انت اللي باديت بالجرح

و هي مكنش لها فالدنيا غيرك

أهلها ربوها على القيم

و إن كرامتها أهم من اي حد

و فوق كل حاجة

دة غير إنها عارفة ربنا

وعارفة أد ايه ربنا كرم المرأة فـ كتابه الكريم

و عارفة كويس إن الرسول اوصى بالنساء

مش عشان تيجي انت تهينها

لما تتعلم ماتجرحهاش

انت عارف طريق بيتها تقدر تروحلها

وهي اكيد هتسامحك بطيبتها وحبها ليك

ولانها هتشوف ساعتها انك قدرتها 

هتقدر تقدرها وللا أحسن تبعد عنها؟؟

الأحد، 8 يوليو، 2012

على سهوة




أنا اللي سَكنت جوه الروح
ولا غيري حبيب تاني
ووقت ما تزيد الجروح
راح تلقى الدوا حناني

هقاسمك كل أحزانك
هكون فـ الغربة عنوانك
هكون سندك وأكون ولدك
ومش هبعد في يوم عنك
دا حبي جوه شريانك

لاكان في بالي في يوم أهوى
ولا أسهر في يوم ما أنام
وحبك جالي على سهوة
ولا قدرت اقاومه حتى
ولا قدرت على النسيان

لقتني بسلم لعيونك
وصار القلب مجنونك
وسلم كل اسلحته

ولما تسلم على صبية
وتحس بالغيرة 
اللي ساكنة جوايا
بتعلن حبك حبيبي ليا
وتحضن بعنيك هوايا
ساعتها بقول للدنيا
آة انا بقى
اللي أبقا حبيبته

انا اللي سَكنت جوة الروح
ولا غيري حبيب تاني
ووقت ما تزيد الجروح
راح يلاقى الدوا حناني

الثلاثاء، 3 يوليو، 2012

صدفة

 
مش بعيدة أكون بحبك
وماكنش عارفة
أجمل الاشياء بتحصل
حقيقي صدفة

مش غريبة دة لاني
برتاح جداً في قربك
بحس قلبي معاك يغني
غنوة ألحانها فـ قلبك

مش غريبة 
ما انت أقرب حد ليا
بلاقيك تملي تحس بيا

دا قبل ما يدق قلبي
بلقا نص الدقة عندك
كاتبة فيها غنوة عنك
إني عاشقة دايبة فيك
وإن حبي دة ماليك
وإن روحك ساكنة فيا


وقبل مايجي ميعاد ما اقابلك
بحس شوقي سابقني قابلك
وأفضل بالساعات
اشوفني فالمرايا
أفضل أسأل ايه الحكاية
وأفضل اسأل البس إيه
يعني حلوة 
كدة هتشوفني بجد عنيه؟

مش غريبة دة لأني
برتاح جداً في قربك
بحس قلبي معاك يغني
غنوة ألحانها فـ قلبك

مش غريبة 
ما انت اقرب حد ليا
بلاقيك تملي تحس بيا

الاثنين، 2 يوليو، 2012

اشتغالات

 
 
آه انا عارفة إنك روميو وليك حكايات
بس لحدي تعالى وحاسب أنا مش 
زي الاشتغالات
أنا مش واحدة هتقضيها 
خروج وتشات
انا عايزة يكونلي الحق
امشي معاك قدام الناس
ولا دادي و مامي يقولو لاء
ماانا هبقالك بقى وخلاص



أوعى تفكر تلعب بيا
و تكسر قلبي
أنا مش سهله وللا غبيه
ولا هتنازل فيك عن حقي
أد ما باخد أد ما بدي
ما انا مش واحدة بجد عادية

راجل شرقي

 
بحبك لما تتعصب
وتعمل فيها زعلان
واشوف الغيرة فـ عيونك
تبان في كلام
تقولهولي ينرفزني
لكن بلاقيك محسسني
 إني معاك بكون في أمان

ورغم القسوة فـ عتابك
و دمعي..
فـي كلمة خلاص سبني
بنظرة يبان فيها عذابك
ودمعة عينك أوام تجري
علي خدي
يزيد البكا
تقولي أهدي
لا هبعد عنك
ولا هخلف في يوم وعدي

تقول آسف
دي غيرتي عليكي سبقاني
وأنا عارف
بإني بكون واحد تاني
و هعمل إيه بقى فيا
راجل شرقي
في طبعي و دمي الحامي
و عصبيتي في كلامي
لكني ضعيف أوي فـ حبك

يرد القلب
بغنوة فيها حروف اسمك
أقول عاشقة
وراضية معاك بقليلي
ويكفيني أكون جمبك
كفاية عليا رضا قلبك
دة يحيني
دي صورتك جوة شرايني
وعيني ما شافت 
في يوم زيك


ورغم القسوة فـ عتابك
و دمعي..
فـي كلمة خلاص سبني
بنظرة يبان فيها عذابك
ودمعة عينك أوام تجري
علي خدي
يزيد البكا
تقولي أهدي
لا هبعد عنك
ولا هخلف في يوم وعدي