الجمعة، 29 يونيو، 2012

حب مراهقة









كل ليلة وانا واقفة ورا الشباك
متدارية ف الستارة
وانت قصادى واقف انا شايفاك
مش حاسسنى وانا محتارة

دة انا يا حبيبى بكون حساك
وانت بتهمس انا سمعاك
لية معذبنى بذنب هواك

واما عينك تيجى ف عينى
واجى اقولك انت ازيك
بيكون ردك والله كبرتى
واحلويتى اكتر واكتر

بتحسسنى ان انا ادامك دايما طفلة
لية مش شايف 
انى خلاص بئيت انا شابة
والسنة دى ف الثانوية 
ناويه اجيب 90ف المية
وادخل جامعة
ولسة شايفنى اننا طفلة


انا والله كبرت ياعمو وبئيت شابة
بس عيونك لية مش حاسة
انا مش عارفة

بص كويس اوى ليا
شوف كدة ايه اتغير فيا
وماتقوليش تانى يابنتى
قول يا حبيبتى
يلا انا راضية

شوف فستانى حلو عليا؟
هو وصندل عالى شويا
ومطولنى اكتر واكتر
وكمان شعرى خلاص بئة اطول
شيلت ضفايرى وسايباه يهفهف
واة لو تعرف
انى بحبك انت ياعمو

بس انا خايفة
علشان عارفة
ردك ليا هيكون ايه

خايفة تقولى انى مراهقة
وحبى دة هياخود مدة
واضحك لماافتكرة ف بكرة
وانت عيونك لية مش حاسة
بصدق مشاعرى
قولى بس كل دة لية؟

بتحسسنى ان انا ادامك دايما طفلة
لية مش شايف 
انى خلاص بئيت انا شابة
والسنة دى ف الثانوية 
ناويه اجيب 90ف المية
وادخل جامعة
ولسة شايفنى اننا طفلة

هحطك في عنيا


بقى عادى 
أوقات نبعد ونقرب
ف بعادى
بتقولى هجرب
لو يوم هيفوت فيه تنسانى
هتحن وترجع من تانى
لو قلبك عن قلبى اتغرب

وتطول المدة ف اوجاعى
وتعيش ازاى بعد وداعى
وبتحلف فيا ماهتفرط

ازاى....؟

ازاى بتقولى انك جاى..!!
استنى والشوق بيخدنى
وانت لمواعيدى نساى
من كتر ماقلبك بيخونى

دة انا نفسى ف حضنك أوي أعيط

نتخانق مهما بنتخانق
كلة إلا انت تفارق
وساعات..
كتير أوي بصفالك
وبسامح علشان نتصالح

وادلع ف عتابك ليا..واتشرط

بس بحنية 

دة انا نفسي ماتستناش آجي
وتسأل قبل ما انا اسأل
علشان احس إنك باقي
وماتخافش عليك أنا مش هتقل

بالعكس..هحطك في عنيا

وهقول للناس إنك ليا
واحساسنا حبيبي بيتبادل
أد ماهحبك موت فيا
خلينا في العشق بنتعادل
ولو انشغلت عنك ثانية
قرب من غير أي مقابل

لو يوم هيفوت فيه تنسانى
هتحن وترجع من تانى
لو قلبك عن قلبى اتغرب

الأربعاء، 27 يونيو، 2012

ساعات

 
 
ساعات كتير بفكر ف قرار من مدة مخدتوش
احلام صغيرة تكبر والحزن اعمل ماقابلتوش

وإن حد سالنى ليه بتضحك
هعمل نفسى ماسمعتوش
من كتر ما نفسى بجد افرح
بفضل ف احزانى اجمع واطرح
واتمنى اقسمها على اتنين

واعيش ف خيالى كدة واسرح
وانسى البعد اللى بيجرح
جوايا قاتلني بقاله سنين

مفاجئة مجنونة


و في مرة حب يعملها مفاجئة
فقرر يجيب لها ورد لانه عارف
إنها بتحب الورد و بتفرح بيه

و لما جيه عشان يديهولها
ابتسمت ابتسامة كبيرة ^__^
و قالتله ميرسيي يا حبيبي
بس مش كنت جيبت 
حاجه مفيدة أحسن
ان شاالله حتى
حزمتين جرجير

ضحك وقالها أحلي حاجة فيكي
هي رومانسيتك يا حبيبتي ^^

فقرر تاني يوم يكرر المفاجئة
بس بشكل مختلف
قام راح جابلها ملوخية 

و قالها حبيت أفاجئك 
بالطريقة اللي بتحبيها يا حبيبتي
أتصدمت هي من المفاجئة
وقالتله أيه دة 
انت جيبت لي جرجير بجد O_O
و هي من جواها بتقول يارتني كنت طلبت حاجة تانيه بقى :D
قالها دي ملوخية يا حبيبتي مش جرجير
أتصرفي بقى و وريني جمال طبخك
مع إن من اولها كدة باين اللي فيها 

بصت له بعنف وقالتله بص يا حبيبي
الورد اللي جبتهولي امبارح كان تحفة
دة انا حتي فضلت طول الليل اصور فيه
قالها وانا هصورلك طبق الملوخية 
اللي انتي هتأكلهوني يا حبيبتي 
من ايديكي الحلوين دول ^_*

و من يومها و هي مابقتش بتعرف تطبخ حاجة غير الملوخية
و هو مابقاش ياكول ملوخية غير من ايديها هي ^_^

الثلاثاء، 26 يونيو، 2012

فوتوغرافيا


بص يا سيدى... و ركز ف الكلمتين اللى هقولهم دول بقى
عشان بس من دلوقتى تعرف ايه ليك وايه عليك
وماتجيش ف يوم تقولى انى ماقولتلكش..

حبيبتك بت جدعه اوى ( احم احم اللى هى انا يعنى )
و مش ناويه اطلب حاجات كتير ..عشان تعرف بس انى بضحى معاك كتير
شوف بقى يعنى مثلا 

انا مش طالبه حماقى او تشامر حسنى يغنى ف فرحنا..لالالا.. و ياسيدى مش طالبه فرح كبير شوفت بضحى ازاى :$:$ المهم تكون انت ابو بدله سودة اللى هيقول ادام الناس كلها " قبلـت زواجكــ" 

وانا عارفه انك هتعوضنى عن الفرح الكبير اللى كنت بحلم بيه ..و هتعملى مفاجئة وتقولى اننا هنروح نحج وتكون انت محرم ليا هناك " ايموشن قلبه بيرقص م الفرحه" 

و كمان خد عندك يا سيدى..مش عايزة ف الــ " honey moon" نسافر اى دوله اروبيه كفايه اننا نسافر اى حته ان شالله " بلطيم" حتى وانا عارفه انك هتودينى " شرم _ او الغردقه" :$:$

تعالى بقى عشان تعرف انى بت جدعه اوى اوى وبتحبك اوى اوى اوى انا يا سيدى مش عايزة شبكة ب 100الف جنيه مع انهم مش خسارة فيا بس زى بعضه ..هراعى ظروفك الاقتصاديه برضه ..هبقا مبسوطة لو لابسه دبلتك انت :$ اة و يكون معاها توينز مش دبله بس ماتسترخصش :@
وانا عارفه انك هتجيب لى كل اللى انا عايزاه..وانا عايزاكـــــــ انت ♥

شوف بقى انا مضحيه معاك بكل دة..بس عشان تبقا عارف وفاهم بقى
الحاجة اللى انا مش هضحى بيها مهما عملت وماتحاولش تقولى لا :@ عشان مابقاش شرانيه معاك هى:
" ان صور فرحنا تبقى صور فوتوغرافيا...اة بقى ماليش دعوة هنتصور عند مصور فوتوغرافيا قول انك هتوافق بقى هاا "

عاشقة فوق البراكين


حبك يجعلني..
أرقص فوق البراكين
ولا شكوى لي في العشق
فالقلبُ العاشقُ مسكين
يغفو أخطائك وبصدق
فـي حضورك أنسى الأنين
تتلاشى السنين
حتى الخيباتِ يمحوها
ينصت لردودٍ يرجوها
لقلبٍ في رؤيته حنين
فـي وجودك تصحو امرأةٌ
قد غفت منذ الرحيل
تصحو على صوتك الهامس
و بـدفء أنفاسك تتلامس..
خُـصيلات شعرها فوق الجبين
تراقصها بـصوتك العازف
أنشودة حبكـ الزائف
ألحانها كالقلب النازف
المُدمى بطعنةِ سكين
في وجودك يتلاشى كلامي
يمتزج كيانك بكياني
ليكون قلبك عنواني
وأظن بأن هواك يقين
ترتوي منه أنفاسي
ويسكن نفسي كالنفسِ
ولكنك تتركني وترحل
وتبقى حولي أكاذيب
تستعمرني من قدمي لرأسي
تتلاعب بي حتى تأتى
وبيدك طوق الياسمين
تعدني بأنك هنا باقٍ في حضني إلى يوم الدين
وبرغم معاناتي أصدق
واظل عاشقةً أرقص.. وحدي فوق البراكين
قد اخشى يومٍ تتركني
تبعد عني و تغيب
فلتبق العمر من أجلي
ولا تـأتني _كالمطرِ_ من حينٍ إلى حين

السبت، 23 يونيو، 2012

عادي يعني


عادي يعنى ....
إن جرحكـ فيا يوجع
و لا حتى أموت يوماتي؟؟

وانت عامل حد تاني
لا بجد حد مقنع
و انت عمال فيا تقنع
إنكـ موجوع زي حالاتي!!

ودن طين والتانيه عجين
والعنين مغمضين
والأيادي مكتفين
مهما أقولك مش بتسمع

و السكوت يملا المكان
والألم ف العين يبان
و انت العاشق الغلبان
طب وظلمك بس فيا
يرضي مين بقى انت قولي؟؟

و ليه تملي
أنا اللى آجى وأعتذر
غصب عنى
قلبي منكـ أنكســــــر
بتعاملني
معاملة إني في معركة
مين خسر
ومين بجد اللى انتصر؟؟

والحقيقه واضحة أهية
الحكاية مافيهاش باقية
يبقا يلا بينا نمشي
الطريق دا كان خطر

و بستغرب على حالي
و أحوالي
وقلبي اللي إتحمل لليالي
وقلبك اللي فجأة بيا غدر

مش سألتكـ
عادي يعنى ....
إن جرحكـ فيا يوجع
و لا حتى أموت يوماتي؟؟

وحشتني الضحكة


وحشتني الضحكة ف عيونكـ
ووحشني أكون أنا ويــــــــاكــ
الحيرة باينة في حـــــــروفكـــ
بتنادي عليــا أنا سمـــــــعاكـــ
مشتاق والشوق دا مغلبني
البعد تاعبني مدوبني
ولا حاجة عشتها نستنــــي
يوم م اللي أنا عشته معاكــ

أنا فاكره يوم ماتودعنا
بكلام جوانا بيوجعنـا
و سكوتك كان يجرح فيا
مش هقدر اقول ارجع ليا
و عنيك بتقول كدة لعنيا
" خليكي شويا وبعدين امشي"
دي حاجات
بتموت كان ليها معنى
و حاجات تانيه بتمنعنا
"أقولك لاء أوعي تسبني"

ازاى تنسالي الحنية
و هكون ف حياتك منسية
ماتدقش في كلام عصبية
دا أنا فاكرة كلامك وكلامي
وقساوة ردك و ملامي
انا هسكت بقي.. ماتكملشي

دا انا حتي كمان
حاسه اللمســــة
علي ايدي معلمة لسه
من ايدك وقت السلام
انا حتي كمان
فاكره الهمسة
بالكلمة الـ متقاله برعشة
جواها مخبيه الم

الجمعة، 22 يونيو، 2012

فيها ايه ,,؟


فيها ايه..
فيها ايه لو نزعل انا وانت
و نعمل اننا متخاصمين

فيها ايه
لو نتكلم عادى
وننسى مين زعل مين

فيها ايه
لو مرة اقولك
تيجى نعمل نفسنا متخانقين
تفضل تعاندنى واعندك
وتحايل فيا وانا احايلك
ونرخم على بعض شويا
تكتبلى غنوة رومانسيه
وبنظرة جواها حنيه
تنسينى انا اصلا مين

فيها ايه
لو مرة تقولى انا حبيتك
وانا اقولك روح يخرب بيتك
دة انا ياما كتير استنيتك
و انت عاملى فيها عبيط

ببرود اعصابك هتقولى
بس انا برضو حبيتك
وانا عارفه انك هتثبتنى
وهقولك 
انا قلبي ياحبيبي بيتك
جواه يا عنيا خبيتك
و هموت لو روحت بعيد

فيها ايه
لو مرة نتجنن
نفضل ساكتين 
ولا نتكلم
وف ثانيه
نضحك زى المجانين

فيها ايه
لو هكتب اسمك مع اسمى
تحلو حروفنا تعاكسنى
و بكلمه رقيقه توصفنى
تدينى صورتك
وعليها تكتبلى
" قولى لابوكى..صاحب الصورة دة عايز يتجوزنى"
هااا وافقتى بقى يا حبيبتى *_^
نبقا واحد بدل اتنين♥

الخميس، 21 يونيو، 2012

رسالة فاضية

 
و لما كان بيزعل منها و يتخاصموا
كانت تبعت له مسج فاضية
على موبايله

كان أول ما يشوف المسج يتغاظ
بس لما كان بيشوف أسمها
كان بيفرح و أوام يتصل بيهاا

كان يبدء كلامه 
خير بعتيلي مسج فاضية ليه
كانت تستعبط دايماً و تقوله
" مين أنا محصلش"
و أول ما تلاقيه خلاص هينهي كلامه
كانت تقوله إن المسج الفاضية دي
كانت كتباله فيها كلمتين بس أتسرقوا في السكة :D

يضحك و يقولها و ايه هما الكلمتين دول بقى

" بحبك أووي مهما تقسى..و تعمل فيها زعلان
بحبك بس أوعى تنسى...إن فيه قلب عمره ما بينام
غير لما يطمن عليك"

و كل ما كانوا يزعله مع بعض
يتصالحوا برسالة فاضية

دلوقتي سابها و مشي 
و ساب حياتها زي الرسالة
فاضــــــــــــــــــــــــية

الأربعاء، 20 يونيو، 2012

و كان عارف


و كان عارف
بإن وجودها كان زايف
لكنه تملي كان خايف
يواجه نفسه يخسرها
فيرجع تاني للوحدة
فقال عادي
يكون عايش مع واحدة
وجودها بس فـ خياله
تملي ف لوحه يرسمها
بلون وردي فـ أحلامه

و قال ياما
هموت لو هي فارقتني
بلاها مواجهة و ملامة
يمكن ما تكونش حبتني
ولا أصلاً هتسمعني
تقولي كلمة توجعني
روح يلا مع السلامة

و أموت و حدي
تعيش هي بقى فـ بعدي
و خوفي دة اللي قيدني
و سلسلني في زنزانة
و جوة عيونها تاه دربي
دي سكة آخرتها ندامة

دي كانت تؤمر بتعذيبي
فتكسرني
يرد القلب يقول زيدي
تزيد أكتر ... تدمرني

و كان عارف
و عامل نفسه مش شايف
ومش حاسس ومش خايف
على نفسه في يوم منها
و كان برضة مأمنها

فقال عادي
يكون عايش مع واحدة
وجودها بس فـ خياله
تملي ف لوحه يرسمها
بلون وردي فـ أحلامه

و كان عارف

الثلاثاء، 19 يونيو، 2012

بحس بوجعك

بحس بوجعك
---------------
وبحس بوجعك أنا قبلك
فماتوجعنيش
فرح علشاني بقى قلبكـ
و ماتقلقنيش

يرضيكـ بقا أعيش
في مكان مهجور
وفتات مكسور
ما يشوفش النور
إلا في ضيكـ

و إن كنت حزين
راح تبكي العين
و تموت البسمه
علي شفايفكـ

و إزاي القلب ماهوش شايفكـ
دة الروح سايباني وعلي كفكـ
هتلاقي ملامحي وأحزاني
طب حتي الضحكة بتشبهلكـ
لو شايف دلوقتي سؤالي
طمني و قولي انت إزيك؟؟